Encontre europèu en mestior de lengas minoritàrias en Aragon

26 abril, 2018 By 0 Comments

Aragon qu’arcuelha un encontre europèu en mestior de lengas minoritàrias, dab l’aragonés com protagonista.

Lo conselhèr de Coesion deu Territòri, Mobilitat e Lotjament, José Luis Soro, que presidè l’amassada deus representants de las 6 entitats deu País Basco, França e Espanha au Talhèr d’Experiéncias de numerizacion de lengas minoritàrias dens l’encastre deu Projècte europèu « LINGUATEC » ; enter eths, lo responsable de l’unitat de Lenga e Tecnologia de Elhuyar, Josu Aztiria. A l’amassada que participèn tanben lo director generau de Politica Lingüistica, Ignacio López Susín, e lo director gavidaire de Torisme en Aragon, Jorge Marqueta.

« L’objectiu qu’ei de poder dispausar d’un diccionari e un traductor de l’aragonés en linha » ce senhalè Soro. Çò de recercat dab aqueth projècte europèu « qu’ei aplicar la numerizacion a las lengas minoritàrias » c’expliquè Soro qui horní que « l’importància d’aquera jornada que demora en que’s coneisherà l’experiéncia de la numerizacion de l’occitan e deu basco ».

Lo projècte europèu EFA 227/16/LINGUATEC « Desvolopament de la cooperacion transfrontalèra e deu transferiment de coneishença en tecnologias de la lenga » qu’a per objectiu de desvolopar, de mostrar e difusir ressorsas navèras, utís e aplicacions lingüisticas innovadoras qui melhoren lo nivèu de numerizacion de l’aragonés, deu basco e de l’occitan. E tad aquò har que s’empara sus un consòrci compausat per las 6 entitats seguentas :

  • ELHUYAR FUNDAZIOA
  • LO CONGRÈS PERMANENT DE LA LENGA OCCITANA
  • UNIVERSIDAD DEL PAÍS VASCO / EUSKAL HERRIKO UNIBERTSITATEA
  • CNRS (CENTRE NACIONAU DE LA RECÈRCA SCIENTIFICA)
  • EUSKALTZAINDIA – REAL ACADEMIA DE LA LENGUA VASCA
  • SOCIEDAD DE PROMOCIÓN Y GESTIÓN DEL TURISMO ARAGONÉS, S.L.U

La collaboracion transfrontalèra que permeterà transferir coneishenças e desvolopar solucions lingüisticas dab potenciau de mercat, que beneficien a professionaus de las lengas e faciliten l’accès public multilingüe a contienguts e avançar suu desvolopament d’un paquet transfrontalèr de tecnologias lingüisticas.

Mercés a la collaboracion de las 6 entitats sòcias deu projècte, que s’espèran obtiéner los resultats seguents:

  • 1 Huelha de rota de numerizacion de l’aragonés.
  • 5 navèras ressorsas lingüisticas (Occitan : Lexic monolingüe e bilingüe occitan/lengas autas, Analisi morfosintaxic e sintaxic ; Basco : reconeishença de votz)
  • 8 utís lingüistics desvolopats o melhorats (Sintèsi vocau de l’occitan, aragonés e basco nòrd, Detector textuau occitan e de varietats de l’occitan, Melhorament de l’arrevirada automatica francés-occitan, espanhòu-basco, espanhòu-aragonés).
  • Lo desvolopament de 6 aplicacions innovadoras : Barra d’arrevirada automatica de telecargar entaus sites web, Aplicacion d’arrevirada automatica de CMS, App d’arrevirada automatica enter lengas deus Pirenèus, Manuau Digitau deu Basco unificat, Diccionari en linha de l’Aragonés, Motor de recèrca semantica web multilingüe.
  • 1 Acòrd enter Universitat – Enterpresa entà la comercializacion de solucions.

Lo projècte EFA 227/16 LINGUATEC qu’estó aprovat au segond aperet a projècte POCTEFA dab un budgèt de 1 227 500 € e qu’ei cofinançat a 65 % peu Hons Europèu de Desvolopament Regionau (FEDER) peu miei deu Programa Interreg V-A Espanha-França-Andòrra (POCTEFA 2014-2020). L’objectiu deu POCTEFA qu’ei d’ahortir l’integracion economica e sociau de la zòna frontalèra Espanha-França-Andòrra. Lo son sostien que’s concentra suu desvolopament d’activitats economicas, sociaus e environamentaus transfrontalèras peu miei d’estrategias conjuntas a favor deu desvolopament territoriau duradís.