La realitat deu territòri deu POCTEFA qu’ei multilingüe, dab 6 lengas presentas de sengles costats deus Pirenèus : l’aragonés, lo castillan, lo catalan, lo francés, l’occitan e lo basco..
Las tecnologias deu lengatge e l’intelligéncia artificiau que contribueishen de faiçon significativa a suberpassar las barrèras lingüisticas.
Las tecnologias deu lengatge que son las qui hèn los ordenadors capables de tractar, de compréner e de reproduíser las lengas umanas, a l’encòp dab la fòrma de tèxte e dab la fòrma de lengatge parlat.
Lo desvolopament d’aqueras tecnologias qu’ei desparièr en las diferentas lengas deus Pirenèus : a un purmèr nivèu de numerizacion que s’i tròban lo francés e l’espanhòu ; a un dusau nivèu, lo catalan e lo basco, qui possedeishen un ensem important de ressorsas e d’utís numerics, e au tresau nivèu, l’occitan e l’aragonés, pr’amor lo lor desvolopament numeric que presenta enqüèra mancas de las granas.
Lo projècte europèu EFA 227/16/LINGUATEC « Desvolopament de la cooperacion transfrontalèra e deu transferiment de coneishenças en tecnologias deu lengatge » qu’a per mira de desvolopar, demostrar e difusir navèras ressorsas, utís e aplicacions lingüisticas innovadoras qui melhoren lo nivèu de numerizacion de l’aragonés, deu basco e de l’occitan. Lo projècte que permeterà la cooperacion tecnologica enter las lengas entà desvolopar navèras ressorsas e utís lingüistics, atau com navèras aplicacions en linha entà facilitar l’emplec de las tres lengas e un accès multilingüe au contiengut peus utilizators finaus.
Rapòrts
- Rapòrt comparat sus la situacion deu basco, de l’aragonés e de l’occitan : que redigim en debut de projècte un purmèr rapòrt suu nivèu d’informatizacion o de numerizacion de las tres lengas deus Pirenèus pertocadas peu projècte : aragonés, occitan e basco. Aqueth rapòrt que serà mes a dia en fin de projècte entà contrastar los progrès obtienguts dens l’encastre deu projècte..
- Huelha de rota entà la numerizacion de l’aragonés : en emparà’s sus l’experiéncia anteriora aquesida en lo maine de la numerizacion d’autas lengas com lo catalan, lo basco e l’occitan, los sòcis deu projècte, en collaboracion dab la Direccion generau de politica lingüistica deu Govèrn autonòme d’Aragon e expèrts extèrnes, que redigín ua huelha de rota qui defineish los mejans e los utís lingüistics que’s deven desvolopar entà progressar cap a la numerizacion de la lenga.
