ELHUYAR FUNDAZIOA. Cap màger deu projècte. Qu’ei lo beneficiari principau deu projècte LINGUATEC ; que s’encuenta enter autas de la gestion administrativa, financèra e de la coordinacion generau deu projècte.
L’objectiu de la fondacion ELHUYAR FUNDAZIOA qu’ei d’encoratjar, de promòver e desvolopar la sciéncia e la lenga bascas. En lo maine de las tecnologias de la lenga e de l’intelligéncia artificiau, los sectors de la recèrca suus quaus la Fondacion e tribalha que son, enter autas, l’arrevirada automatica, la creacion automatica de ressorsas lingüisticas, l’extraccion de tèxtes e las tecnologias de la paraula. ELHUYAR que dispausa d’aulhors d’ua experiéncia solida en lo maine deu pilotatge e de la participacion a projèctes europèus de tecnologias deu lengatge. La Fondacion qu’ei sòcia deu Hialat basco de sciéncia e tecnologia.
LO CONGRÈS PERMANENT DE LA LENGA OCCITANA qu’ei, dab Elhuyar Fundazioa, l’organisme a l’origina de l’idea e cargat de la coordinacion deu projècte.
LO CONGRÈS qu’ei l’organisme interregionau de regulacion de la lenga occitana. Lo son objectiu qu’ei de contribuir a la vitalitat e au desvolopament de l’occitan en tribalhar entà ahortir la soa difusion e la soa codificacion per la produccion d’utís en ligam dab los divèrs aspèctes de la lenga occitana (lexicografia, lexicologia, terminologia, neologia, fonologia, ortogràfia, gramatica e toponimia).
UNIVERSITÉ DU PAYS BASQUE / EUSKAL HERRIKO UNIBERTSITATEA (UPV/EHU) L’UPV/EHU qu’ei representada peu Grop IXA, un grop de recèrca multidisciplinari compausat per 28 professors de mantuns centres e departaments de l’universitat (informatica, filologia basca, didactica de la lenga…) qui an ua experiéncia longa en lo maine de las tecnologias lingüisticas e lo desvolopament de produits comercializables.
Lo CNRS (CENTRE NACIONAU DE LA RECÈRCA SCIENTIFICA) qu’ei l’un deus organismes màgers de recèrca multidisciplinària deu monde per l’excelléncia deus sons resultats en la recèrca e l’innovacion.
Dens l’encastre deu projècte LINGUATEC, qu’aportarà las soas competéncias en lingüistica occitana e francesa e en tractament automatic de las lengas. Aqueste organisme qu’a experiéncia en la construccion de ressorsas entà l’occitan.
EUSKALTZAINDIA qu’ei l’organisme oficiau cargat de la lenga basca, l’euskara. Fondat en 1919, que realiza estudis sus aquera lenga entà protegir-la e que’n defineish las règlas de normalizacion deu basco.
Dens l’encastre deu projècte LINGUATEC qu’aportarà enter autas las competéncias e experiéncias de qui dispausa en lo maine deu tractament de las basas de dadas lexicograficas e còrpus lingüistics atau com en l’indexacion e lo classament de tèxtes entà la recèrca.
La SOCIEDAD DE PROMOCIÓN Y GESTIÓN DEL TURISMO ARAGONÉS, SLU, (societat de promocion e gestion deu torisme aragonés), o TURISMO DE ARAGÓN, qu’ei l’organisme cargat peu Govèrn autonòme d’Aragon de la promocion toristica e deu patrimòni regionau, atau com la lenga aragonesa. Qu’a ua experiéncia grana en las activitats de promocion e de difusion. Que desvolopè projèctes de navèras tecnologias en collaboracion dab l’ITA.