O territorio POCTEFA ye una realidat multilingüe, an conviven 6 luengas á toz os dos costaus d’os Pirineus: l’aragonés, o castellán, o catalán, o franzés, l’oczitano y l’euskera.
As tecnolochías d’a luenga y a investigazión lingüistica contrebuyen sinificativamén a espaldar os barraches lingüisticos.
As tecnolochías d’a luenga son aquellas que gosan fer que os ordinadors sían capables de tratar, apercazar y mesmo reproduzir os luengaches umans, tanto si amanixen como testos como en forma de parlache charrau.
O desembolique d’istas tecnolochías ye dispar en as diferens luengas d’os Pirineus: en un primer libel de dichitalizazión se troban o francés y o castellán; en un segundo libel, o catalán y l’euskera, que poseyen un conchunto sinificativo de recursos y ferramientas dichitals, y en o terzer libel se i-troban l’oczitano y l’aragonés, ya que encara lis manca asabela de faina en o suyo desembolique dichital.
O proyeuto europeu EFA 227/16/LINGUATEC “Desembolique d’a cooperazión transfronteriza y a transferenzia de conoxenzia en tecnolochías d’a luenga” tiene como obchetivo desenvolver, contrimostrar y espardir nuevos recursos, ferramientas y aplicazions lingüisticas innovaderas que amilloren o libel de dichitalizazión de l’aragonés, de l’euskera y de l’oczitano. O Proyeuto permitirá a cooperazión tecnolochica entre luengas ta desenvolver nuevos recursos y ferramientas lingüisticas, asinas como nuevas aplicazions on-line ta fazilitar l’emplego d’as tres luengas y l’azeso multilingüe a contenius por a chen.
Informes
- Informe comparau sobre a situazión de l’Euskera, l’Aragonés y l’Oczitano: A l’inizio d’o proyeuto s’ha realizau un primer informe comparau sobre o libel d’informatizazión u dichitalizazión que tienen as tres luengas d’os Pirineus obcheto d’o proyeuto: aragonés, oczitano y euskera. En rematar o proyeuto iste informe será actualizau ta constatar os abanzes aconseguius en o marco d’o proyeuto.
- Fuella de Rota ta la dichitalizazión de l’Aragonés: Contando con a experienzia previa en a dichitalizazión d’atras luengas, como lo catalán l’euskera y l’oczitano, os sozios d’o proyeuto, en colaborazión con a Direzión Cheneral de Politica Lingüistica d’o Gubierno d’Aragón y expertos externos, han elaborau una Fuella de Rota que estableix os recursos y ferramientas lingüisticas que s’han de desenvolver ta abanzar en a dichitalizazión d’a luenga.
