Consorzio
O consorzio d’o proyeuto Linguatec ye formau por istas entidaz:
ELHUYAR FUNDAZIOA. “Chefe de ran” d’o proyeuto. Ye o benefiziario prenzipal d’o proyeuto LINGUATEC, ocupando-se, entre atros, d’a chestión administrativa- finanziera y a coordinazión cheneral d’o proyeuto.
ELHUYAR FUNDAZIOA tiene por obcheto y fin fundazional empentar, promover y desenvolver la zenzia y l’euskera. En l’ambito d’as tecnolochías d’a luenga y a intelichenzia artifizial, as arias d’investigazión que desembolique incluyen a traduzión automatica, a creyazión automatica de recursos lingüisticos, a minería de testo y as tecnolochías d’a fabla. Asinasmesmo, ELHUYAR tiene una larga esperenzia de liderazgo y partizipazión en proyeutos europeus de tecnolochías d’a luenga. Ye miembro d’o Rete Basco de Zenzia y Tecnolochía.
LO CONGRÈS PERMANENT DE LA LENGA OCCITANA ye, de conchunta con Elhuyar Fundazioa, a entidat d’a cuala parte la ideya y coordina o proyeuto.
LO CONGRÈS ye l’organismo interrechional ta la regulazión de l’idioma oczitán. O suyo obchectivo ye contribuyir a la vitalidat y o desembolique de l’oczitano treballando en a suya conoxenzia y codificazión por medio d’a produzión de ferramientas relazionadas con os diversos aspeutos d’a luenga oczitana (lexicografía, lexicolochía, terminolochía, neolochía, fonolochía , ortografía, gramatica y toponimia).
UNIVERSIDAD DEL PAÍS VASCO / EUSKAL HERRIKO UNIBERTSITATEA (UPV/EHU) La UPV/EHU ye representada por o Grupo IXA, un grupo d’investigazión multidisziplinar formau por 28 profesors de diferens zentros y departamentos d’a universidat (Informatica, Filolochía Basca, Didactica d’a luenga…) con firme esperenzia en tecnolochías lingüisticas y en o desembolique de produtos comerzializables.
CNRS (CENTRE NATIONAL DE LA RECHERCHE SCIENTIFIQUE) O Zentro Nazional d’Investigazión Zientifica ye una organizazión publica d’investigazión multidisziplinaria, y se i-troba entre as prenzipals organizazions d’investigazión d’o mundo por os suyos sobrebuenos resultaus en investigazión e innovazión.
En o proyeuto LINGUATEC aportará as suyas competenzias en lingüistica oczitana y franzesa y en o tratamiento automatico d’as luengas. Cuenta con esperenzia en a construzión de recursos ta l’oczitano.
EUSKALTZAINDIA ye a organizazión ofizial encargada de l’euskera, ye dezir, a luenga basca. Fundada en 1919, leva a cabo estudios sobre ista luenga, con a fin zaguera de protecher-la, y ye qui establexe a normativa ta la normalizazión de l’euskera.
A lo proyeuto LINGUATEC aportará, entre atras, as competenzias y esperenzias que conta en o campo d’o tratamiento de bases de datos lexicograficas y corpus lingüisticos asinas como en a indexazión y clasificazión de testos ta fer rechira.
La SOCIEDAD DE PROMOCIÓN Y GESTIÓN DEL TURISMO ARAGONÉS, SLU, u TURISMO DE ARAGÓN ye a interpresa publica d’o Gubierno d’Aragón ta la chestión, promozón y enchegada de proyeutos innovaderos en materia turistica, incluyida la chestión d’o patrimonio material e immaterial.
En coordinazión con a Direzión Cheneral de Politica Lingüistica d’o Gubierno d’Aragón, partizipa por primera vegada en un proyeuto europeu en materia lingüistica, incorporando l’aragonés en o desembolique e implantazión de tecnolochías d’a luenga, tot ixo con importans aplicazions en o campo turistico.